اسلام ٹائمز۔ وزیر مملکت برائے پانی و بجلی عابد شیر علی نے کہا ہے کہ سانحہ پشاور کا اصل مقصد پاکستان کی بین الاقوامی سطح پر بدنامی کرنا ہے مگر قوم پاکستان کو بدنام کرنے کی اس سازش کو ناکام بنا دیں گے۔ ان خیالات کا اظہار انہوں نے مسلم لیگ یوتھ ونگ ملتان سٹی کے صدر زاہد عدنان گڈو سے ملاقات میں کیا۔ اس موقع پر انہوں نے مزید کہا کہ ملک سے دہشت گردی اور بجلی بحران کا خاتمہ اولین ترجیح ہے۔ قوم کو کچھ عرصہ میں تبدیلی نظر آئے گی۔ انہوں نے کہا کہ بلدیاتی الیکشن میں نظریاتی اور قربانی دینے والے کارکنوں کو آگے لایا جائے گا۔ یوتھ ونگ کے ذریعے نئے اور پرجوش نوجوانوں کو سامنے لایا جائے گا دریں اثنامسلم لیگ (ن) یوتھ ونگ ملتان سٹی کے صدر زاہد عدنان گڈو کی قیادت میں گلگشت کالونی سے گول باغ گلگشت تک مسیحی برادری سے اظہار یکجہتی کیلئے ریلی بھی نکالی۔